2025-yil 27-30-yanvar kunlari Pokistonning Lahor shahrida boʻlib oʻtgan 7-Xalqaro Pazandachilik Chempionati (Pakistan International Culinary Championship) dunyoning eng kuchli oshpazlarini jamladi. Musobaqada AQSh, Shri-Lanka, Maldiv orollari, BAA, Eron, Marokash, Turkiya, Bangladesh, Malayziya va boshqa mamlakatlardan oshpazlik mahorati ustalari ishtirok etdilar. Ularning chiqishlarini yuqori darajadagi hakamlar baholab bordilar.

Oʻzbekiston Oshpazlar uyushmasi jamoasi oʻz mahoratini namoyish etib, 5 ta oltin, 1 ta kumush va 1 ta bronza medalini qoʻlga kiritdi!

Jamoaning yutuqlari:

Alimatova Nazira – Oltin (“Baliq taomi” nominatsiyasi), Kumush (“Pasta” nominatsiyasi)

Ruziboyev Azamat – Oltin (“Tovuq go’shtidan taom” nominatsiyasi)

Muhamedjonov Umar – Bronza (“Tovuq go’shtidan taom” nominatsiyasi)

Jamoaviy ishtirok – 3 ta Oltin medal (“Qora quti” nominatsiyasi)

Qolaversa oshpazlarimiz milliy oʻzbek taomlarini namoyish etib, yurtimiz gastronomik boyliklarini dunyoga tanitdilar. Bu muvaffaqiyat Oʻzbekiston oshpazlik anʼanalari va professionallik darajasining yuqoriligini yana bir bor isbotladi.

Ushbu gʻalabaning ahamiyati:

Oʻzbek oshxonasini jahon miqyosida targʻib etish;

Oʻzbekistonda gastronomik turizmni rivojlantirish;

Yosh oshpazlarni rivojlanishga va mahoratini oshirishga ilhomlantirish.

Chempionat Butunjahon Oshpazlar hamjamiyati uyushmasi (WACS, Worldchefs) – 110 ta mamlakatdan 10 million oshpazni birlashtirgan yirik xalqaro tashkilot himoyasida oʻtkazildi. Musobaqa Royal Palm Golf and Country Club majmuasida Pokiston Oshpazlar Assotsiatsiyasi (CAP) va Turizm va Mehmonxona Menejmenti Kolleji (COTHM) hamkorligida tashkil etildi.

Oʻzbekiston Respublikasi Turizm qoʻmitasiga milliy madaniyat va gastronomiyani xalqaro maydonda targʻib qilish va rivojlantirishga qoʻshgan hissasi hamda koʻrsatgan yordami uchun chuqur minnatdorchilik bildiramiz!

Pokistondagi Oʻzbekiston Elchixonasiga bizning jamoamizni Lahorda samimiy kutib olgani, qoʻllab-quvvatlagani va hamkorlik qilgani uchun alohida minnatdorchilik bildiramiz. Sizning gastronomiya sohasidagi xalqaro hamkorlikni rivojlantirishdagi hissangiz beqiyos ahamiyatga ega!

Oʻzbekiston Oshpazlar uyushmasi jamoasini gʻalaba bilan tabriklaymiz va yangi yutuqlar tilaymiz!