2025 йил 3 февраль куни Ўзбекистон Республикаси Туризм қўмитасида муҳим учрашув бўлиб ўтди. Унда Туризм қўмитаси раиси ўринбосари Ниязов Сардор Мухторович, дунёдаги энг нуфузли ошпазлик мактабларидан бири Le Cordon Bleu вакили KiJung Hyun (Le Cordon Bleu Paris’да савдо ривожлантириш ва талабаларни қабул қилиш бўйича менежер), шунингдек, Ўзбекистон Ошпазлар уюшмаси раиси А. Умаров иштирок этди.

Учрашув давомида Ўзбекистон миллий таомларини халқаро миқёсда тарғиб қилиш, уларни бренд даражасига олиб чиқиш, шунингдек, гастрономик туризмни ривожлантириш бўйича ўзаро ҳамкорлик масалалари муҳокама қилинди.

Le Cordon Bleu – бу бир неча юз йиллик тарихга эга бўлган, дунёдаги энг машҳур пазандачилик академияларидан бири. Унинг билим ва тажрибаси, шунингдек, Ўзбекистон миллий ошхонасига бўлган катта қизиқиши мамлакатимизда пазандачилик соҳасини янги босқичга олиб чиқишга ёрдам беради.

Мазкур ташаббуслар мамлакатимизда гастрономик туризмни ривожлантириш, миллий таомларимизни дунёга танитиш ва пазандачилик соҳасидаги мутахассисларнинг малакасини оширишга хизмат қилади.

Ўзбекистон Ошпазлар уюшмаси ва Туризм қўмитаси халқаро ҳамкорлик доирасида бу йўналишдаги ишларни янада кенгайтириш ва улкан лойиҳаларни амалга оширишни режалаштирмоқда.