Shu kunlarda Moskva shahrida boʻlib oʻtayotgan “Sayohat qil!” IV Rossiya turizm forumi doirasida, Turizm qo‘mitasi hamda mamlakatimizning Rossiyadagi elchixonasi bilan hamkorlikda O‘zbekistonning sayyohlik salohiyatini aks ettiruvchi milliy stend tashkil etildi.

Unda tashrif buyuruvchilar mamlakatimizning sayyohlik salohiyati, qadimiy Xiva, Toshkent, Samarqand va Buxoro shaharlari, turizm va transport infratuzilmasi, viza rejimi, “Zomin” turistik-rekreatsion zonasi va “Chorvoq” erkin turistik zonasi, Konigil sayyohlik qishlog‘i, hamda gastro-, eko-, etno- va boshqa turizm turlari haqida keng ma’lumot olishlari mumkin.

O‘zbekiston stendiga Rossiya Federatsiyasi hukumati raisi o‘rinbosari Dmitriy Chernishenko tashrif buyurib, Turizm qo‘mitasi raisining birinchi o‘rinbosari Jamshid Abdusalomov bilan suhbatlashdilar. Tomonlar O‘zbekiston va Rossiya rahbarlarining muzokaralari davomida erishilgan kelishuvlarni amalga oshirish muhimligini ta’kidlab, sayyohlar oqimini ko‘paytirish ustida ishlash zarurligini ta’kidladilar. Shu tariqa, tomonlar O‘zbekiston va Rossiya o‘rtasida sayyohlik oqimini ko‘paytirish uchun shart-sharoitlar yaratish bo‘yicha Harakatlar rejasini amalga oshirishni davom ettirish masalasini ko‘tardilar.

Tadbir tashkilotchilari va mehmonlari O‘zbekiston stendini qiziqish bilan tanishdilar va o‘z fikr va taassurotlarida, mamlakatimizga tashrif buyurish istagini bildirdilar.

12-15 iyun kunlari “Sayohat qil!” IV Rossiya turizm forumida ishtirok etish uchun Turizm qo‘mitasi raisining birinchi o‘rinbosari Jamshid Abdusalomov boshchiligidagi O‘zbekiston delegatsiyasi Moskvada shahrida bo‘lib turibdi.

Eslatib o‘tamiz, Rossiya Prezidentining O‘zbekistonga davlat tashrifi doirasida “Rossiya Federatsiyasi va O‘zbekiston Respublikasi o‘rtasida 2025–2026 yillarga mo‘ljallangan turistlar oqimini oshirish bo‘yicha hamkorlik dasturi” imzolangan edi.